العرب نيوز ( رؤوس - أقلام ) بقلم الشاعر والاديب فؤاد نعمان الخوري - صارُوا الكتُب عا الرفّ دزّينِهْ،

يا رفّ الحساسين هنّينِي؛
غطّوا الحبايب متل الفراشاتْ
عا حبقتِي، وضحكِت بساتيني...
 
من زغرتي مكبّش بها الكلماتْ،
ونار القصيده تلفح جبيني؛
والعقل زينِه بأغلب الأوقاتْ،
 
قولَك جْنوني بالشعر زينِهْ؟
بتمرق ببالي كلّ المحطّاتْ،
 
وبقول: في ناطور حاميني،
مرّات يبعتلي حلم، مرّاتْ
إيد الهوا تلوّح وتهديني...
 
دبلِت الرحله، يبسِت الطرقاتْ،
يا غيمة العيد انزلي اسقيني:
تا ضلّ عم أوفي ندر ما ماتْ،
 
وانشُر دواويني عا سطح العمر،
وبقلوبكُن انشُر دواويني!