العرب نيوز ( رؤوس - أٌقلام ) بقلم الزميل الدكتور جميل دويهي -  من التلج كانوا ينزلو

من فَوق... من بين التلالْ
قامات متل الزنْبق البيلوح 
مع ريح الشمالْ...
 
حرَّاس هنِّي للمدى
واللي اعتدى
ما ضَلّ من صَوتو صدى...
 
نحنا لنا عسكر بيسْكر بالقتال
يا جيشنا رمز الفِدا
لا قبلك وبعدَك حدا
ولولاك ما فـي أرز أخضر عالجبال.
 
 
بْحيِّيك يا حامي الحِمى
يا سْيوف أعلى من السما...
 
بْحَيّي شعب لبنان
هالشعب الكبير
يللي إذا دقّ النفير
بيصير كلُّو جيش
بالظرف الخطير...
 
نحنا ما بدنا نعيش إلا واقفين
نحنا ما بدنا نموت إلا واقفين
واللي دعَس عا حدودنا
رح تدْعَسو خْيول الهَدير...
 
وبيضلّ لبنان الحلو
الهُوّي لِنا ونِحنا إلو
مارد بوِجّ العاصْفه والزمهرير. 
 
يا جاهلين الدِّين أيّا كتاب دِين
بيقول لازم تدْبَحو بالناس 
عا شمال ويمين؟
وبيقول لازم تِهِدْمو البيوت
عا روس الشيوخ العاجزين؟
شْياطين إنْتو بالليالي فالتين
ورَح ترْجعو عا جهنّم الحمرا 
اللي منها طالعين
ونحنا اللي عِشنا عالصخر
من قَبل ما تكون السنين
بالصخر بدنا نضلّ
بالعطر بدنا نضلّ...
 
والأرز عالي مطرحو،
ما بْينكِسِر مجْدو
وَلا بْيحني جَبين. 
 
يا جيش لا ترمي السلاح
خلّيك بالميدان
نسر الغيم ما بيكْسر جْناح
خلّي عا إجرَك يرْكع الموت الجبان
خلّي السيوف تْصير لونا أرجوان
وعَلّي بصوتَك كل ما هدرِت رِياح:
 
يوسف كرم جايي عا خيل العنفوان
وقدّام فخر الدين بيرجّ الزمانْ
والعسكري اللي واقف بعرسال 
تا يحْمي الكيان
جرْحو علم لبنان غطّى
وصار جرْحو بكلّ ساحه مهرجان.
 
بيّي راح مع العسكر
خيّي راح مع العسكر
وابني راح مع العسكر
ومش رح يبقى واحد خاين
مش رح يبقى الوجُّو أصفر
ووَحْدك يا جيش اللبناني 
باقي... باقي
متل البرج الما بْيتكسّر
لولا الدمّ الإنت سْكبْتو 
ما عِنَّا قنديل منوّر...
 
ما فـي عنّا ساحَه ْبتِضْوي
ولا عيد...
 
ولا غصن مْزَهّر...
 
تسْلم يا جيش اللبناني
هنّي زغار
وإنت الأكبر
إنت الأكبر
إنت الأكبر.
________________________
 
- شكراً لصاحب أو صاحبة الرسم (مجهول)، والصورة استخدمناها لغرض غير تجاري،