هلقدّ بحبّك

 
العرب نيوز ( رؤوس - أقلام ) بقلم د.جميل الدويهي - هلقدّ بحبّك
بعد غيبه، رجعت إكتبلك،
ولحظة ما رحتي من بالي بالإيام الصعبه.
 
إنا بيّاع الفرح،
 
حامل كيس اللعب وجايي لعندك،
 
تا إعطيك لعبه وتفرحي فيها.
 
لا تردّي الهدية، بْصير متل غبرة الأرض ما لي قيمة.
 
لا تجرحيني لأنك إنتي الوحيده النور بعيوني.
 
كلما غبتي بتدبل الورده تحت الغيم،
 
وبصْفن بالزمان،
 
وبوقع متل شجرة يابسة عا بواب الخريف.
 
قديش بحبّك ما بعرف...
 
خلصو الكلمات. خلص الشعر. خلصو الكتب. 
 
ولو مشيتي على وجعي سنين وضحكو عيونك بفرح أنا... هلقد بحبّك. 
 
في حدا قبلي من الشُّعرا حبّ هلقدّ؟