العرب نيوز ( رؤوس - اقلام ) بقلم الدكتور جميل الدويهي - هيك الدني، منموت نحنا وواقفين

يا حامل التابوت، بحلفلك يمين
ما قدرت إغفا بعد ما غاب الحلو
وما قدرتْ قلّو كيف جرّحني الحنين...
 
موعود شوفو كنت آخِر هالسنِه
وما عرفت بَدّو يروح عا تاني دِني
ما بيغْلطو الإيّام مرّه بالحساب
والكاس داير عالفقير وعالغني...
 
البْيوت هِربو، وما بقا نقشع حدا
وما عاد زهر اللوز فتّح عالهدا 
وعصفور كانو جوانحو متل الربيع
صوتو وقع عالأرض، وانبحَ الصدى... 
 
حالف ما بدّو يرجع... وشو معجّلو؟
البواب زعْلو... والشجر عم يسْألو:
معقول نطفي الشمع ويضيع الطريق...
وعيون سُود كبار ما يتكحّلو؟
 
إنتي ملاكي... وليش ما بقيتي معي
مْن بعيد بصرخ صرختي وما بتسمعي
تركتي جميل، وما بقا العالم جميل
ورح ضلّ إنطر عالبحر تا ترجعي...
 
كل البـِقي من بَعد منّك ذكريات
كومِة صُور عالارض ما فيها حياة...
يا رَيت فيّي الرُّوح إعْطيها لِكِي
وإلا لِكي ما بْحبّ إعمل معجزات...
 
لا تسكّري الإيّام عا حْكاياتنا
وودي سلامي لأهلنا ورفقاتنا 
وقولي لهن رح نلتقي بعد الغْياب
وهونيك بدهُن يرجَعو ضحكاتنا.