انطانيوس أبو ملحم : يا عمر

العرب نيوز ( رؤوس أقلام ) بعد خضوعه لعملية جراحية قاسية نشر الشاعر انطانيوس م. أبو ملحم هذه الابيات .
يا عمر
وشو بعد بدك، ختْيِر وإحني ؟
ما حذرت، لا يا عمر ، سامحني
تْطمّن ، أنا خي ٱلرمح ، رح ضل
بِلْوي معك شي يوم، ما بِتْني
وقفت بطريقي دقر ، ما بيحلّ
قصدك، يا تكسرني ، يا تدبحني
تبقى عملّي حساب قبل ٱلكل
وٱركاع مطرح ما بتلمحني
*. *. *
بعرف بطولاتك ، وهم عالحل
وأكبر بطولة ، قدرت تجرحني
حملتك سنين سنين ، حلْوَك خَلّ
تْجَمِّعْ مآسي ، تَ تفرّحني
بغلب بقلّك فل ، ما بتفل
مفكر عنادك هيك ، ريَّحني
هادا قَدَر ، تبقى رفيق ٱلظلَ
تَ ألف مِنّيّة تْربّحني
سْمَعني شو بدي قول يا مخْتلّ
مهما عملِت ، ما فيك تبطحني
عندي أمل ، إرجع ع بيتي طِلّ
عَ كل ما بْعيمار ، سوسحني
عَ صنوبرا ، ٱللي متَوَّجا عٱلتلّ
عَ مروق نملة ، شاحطة طحنة
*. *. *
تمرجل ، تَ تشبع ، يوم رح بتْمِلّ
وما تعود ، عٱلغصّة تْمالحني
بكرا بْيِجي شي نهار، رح تِنْشَلّ
وتروح وحدك ما تْصافحني
وإبقى أنا ، بصدر ٱلدني عمغِل
إسم وشعر وقلام تمدحني
بْرأيي يا عمري ، تْبِلّْ ريقك بَلّ
من هٱلدني وتروح عالي الراس
بِرحل معك وبروح ما بحني .

#العرب_نيوز ” أخبار العرب كل العرب “

أسرة تحرير العرب نيوز الشاعر الصديق الشاعر انطانيوس م. أبو ملحم وتتمنى دوام الصحة والعافية