العرب نيوز أخبار العرب كل العرب

العرب نيوز ( رؤوس - أقلام )  هلَّق بيكُون الكرَز

هلَّق بيكُون الكرَز متل البنت مخجُول،
ناطر عَ هاك الكتِف يمرُق حدا يلمُّو؛
و"وردِه" عَ كعب الدرَج فسطانها مشكُول،
 
و"فايز" عَ درب الشفَق ساحِب ورا امُّو...
هلَّق بيكون القمح فاق وغمَر الحقُول،
 
واللوز كل شي برَد نيسان، ما هَمُّو؛
وسجَّل الدوري ولادُو بْ معهد الملُّول،
 
والورد راهب رفَع كاسُو، ودلَق كمُّو!
وقاعِد ب سدني أنا، والهجر عم بيطُول،
 
والعَقل حاكِم، وقلبي ما فتَح تمُّو؛
ومرَّات يلمَع شَعر أو وجه أو مريُول،
ويهبّ قلبي، وأنا انحَاز من يَمُّو...
وقاعِد ب سدني أنا، وخايف يجي أيلُول،
 
لمَّا طيور الصّفر عَ التين يلتمُّو،
يسأَل عليّي الكرِم، قلّو: أنا مشغُول،
 
وتعزُم الكركِه العنَب يتبرَّع ب دمُّو..
المكتُوب شقفة ورَق، نتفة حكي مشغُول،
 
والشوْق ما في ولا مكتوب بيضمُّو؛
حطَّيْت قلبي على المكتُوب ورقة بُول:
 
كلما حبيبي قري المكتُوب بيشمُّو!